Innskráning í Skólavogina fer fram á síðunni: https://nidurstodur.skolavogin.is/
Skólavogin var sett á laggirnar sem tilraunaverkefni af hálfu Sambands íslenskra sveitarfélaga í samstarfi við valin sveitarfélög árið 2007. Skólavogin skilar samanburði á viðhorfi nemenda, foreldra og kennara í grunnskólum, árangri nemenda og ýmsum rekstrarupplýsingum. Skólavogin er tæki sem nýtist sveitarfélögum við að koma til móts við lögbundnar kröfur um mat og eftirlit með skólum ásamt því að veita gagnlegar upplýsingar vegna úthlutunar fjármagns til skóla.
Vefkerfi Skólapúlsins hýsir bæði Skólapúlsinn og Skólavogina. Þátttaka í Skólavog felur ekki í sér sjálfstæðar viðhorfakannanir, en niðurstöður úr Skólapúlsinum verða nýttar inn í Skólavogina. Samningsaðilar telja samnýtingu niðurstaðna mikinn kost þar sem hún kemur í veg fyrir tvíverknað og aukið álag á skólastarf. Fagleg stýring Skólavogarinnar var á hendi verkefnisstjórnar, sem Samband íslenskra Sveitarfélaga hafði forgöngu um að stofna með formlegum hætti. Verkefnisstjórnin var vettvangur fyrir samráð og þróunarstarf og sátu fundi hennar sérfræðingar Skólapúlsins og sambandsins. Einnig var leitað til sérfræðinga og forsvarsmanna sveitarfélaga um að sitja í verkefnisstjórninni. Verefnastjórnin hefur lokið störfum.
Vísar rannsóknir ehf. innheimtir áskriftargjöld af sveitarfélögum og er áskriftargjöldum ætlað að standa straum af kostnaði við þróun, rekstur og uppbyggingu Skólavogarinnar. Áskriftargjöld eru annars vegar árgjald og hins vegar gjald fyrir þær reglubundnu kannanir sem eru uppistaðan í gagnaöflun Skólavogarinnar.