Nemendakönnun í 2.-5. bekk fer fram í október á hverju ári (könnuninni var flýtt frá apríl yfir í október frá og með skólaárinu 2022-23). Hægt er að svara könnuninni á íslensku, ensku, pólsku, dönsku, sænsku, úkraínsku og spænsku. Könnunin er studd með talgervli sem les spurningarnar upp þegar smellt er á þær. Október var valinn þar sem talið er að nemendur í 2. bekk séu komnir með fullnægjandi reynslu af skólastarfinu til að leggja mat á gæði þess á þessum tíma.

Könnunin mælir ánægju af lestri, ánægju með skólann og vellíðan í skólanum. Spurningar um ánægju af lestri eru upprunalega fengnar úr rannsókn McKenna og Kear (1990) og spurningar um líðan eru fengnar úr rannsókn McLellan og Steward (2015). Bæði mælitæki voru þýdd af tveimur óháðum þýðendum. Að því loknu voru þýðingarnar samræmdar af þriðja aðila. Íslensku útgáfurnar voru loks forprófaðar og greindar þar sem fram fór leitandi og staðfestandi þáttagreining af tveimur óháðum aðilum. Spurningunum var fækkað og þær aðlagaðar að íslensku skólastarfi. Mælitækin voru einnig aðlöguð að fyrirlögn með myndaaðstoð og talgervli. Forprófun könnunarinnar var gerð vorið 2017 og fyrsta fyrirlögn fór fram árið 2018. Tölurnar úr fyrstu fyrirlögn verða notaðar til viðmiðunar og því mun talan 5 á kvarðanum standa fyrir dæmigerðan nemanda skólaársins 2017-18 næstu 5-10 ár héðan í frá.

Könnunin inniheldur 14 spurningar sem meta fjóra þætti:

1. Ánægja af lestri (5)
2. Ánægja með skólann (4)
3. Vellíðan í skólanum (4)
4. Ánægja með matinn í skólanum (1)

Valið á spurningum er endurskoðað árlega að vori á samráðsfundi með notendum kerfisins.

Framkvæmd könnunar

1. Upplýsingar til foreldra og neitanir

Tengiliður Skólapúlsins tilkynnir foreldrum um þátttöku nemenda í Skólapúlsinum. Fylgt er reglum skólans um þátttöku nemenda í skoðanakönnunum þar sem að engum persónuupplýsingum er safnað. Skólapúlsinn mælir með að í upphafi skólaárs sé sent út bréf í tölvupósti til foreldra/forráðamanna til upplýsingar um að skólinn hyggist leggja fyrir spurningalista með notkun Skólapúlsins. Hægt er að nálgast bréfið og prenta það út hér fyrir neðan. Þar sem engin nöfn eru send til Skólapúlsins er ekki nauðsynlegt að senda upplýsingabréfið út áður en upplýsingar um fjölda nemenda er sendur inn. 

Foreldrabréf fyrir nemendakönnun í 2. – 5. bekk (íslenska, PDF)

Foreldrabréf fyrir nemendakönnun í 2. – 5. bekk (íslenska, Word)

Foreldrabréf fyrir nemendakönnun í 2. – 5. bekk (enska, PDF)

Foreldrabréf fyrir nemendakönnun í 2. – 5. bekk (enska, Word)

Foreldrabréf fyrir nemendakönnun í 2. – 5. bekk (pólska, PDF)

Foreldrabréf fyrir nemendakönnun í 2. – 5. bekk (pólska, Word)

1.1. Ath! Þessi útgáfa upplýsingabréfsins er ætluð þeim skólum sem kjósa að afla einu sinni skriflegs samþykkis frá foreldrum þegar að nemandi hefur nám í skólanum. Skriflegt samþykki foreldra er ekki lagaleg skylda til að framkvæma kannanir Skólapúlsins:

Samþykkisbréf fyrir nemendakönnun í 2.  – 5. bekk (PDF)

Samþykkisbréf fyrir nemendakönnun í 2. – 5. bekk (Word)

2. Upplýsingar sem sendar eru til Skólapúlsins í upphafi skólaárs:*

Þátttaka skólans í könnuninni er staðfest með innsendingu nemendalista. Listinn á að vera í einu Excelskjali án auðra raða. Excelskjalið á að innihalda 2 samliggjandi dálka með eftirfarandi titlum og í eftirfarandi röð:

Til að senda inn listann skráir tengiliður eða skólastjóri sig fyrst inn á sitt vefsvæði á síðunni skolapulsinn.is. Efst á vefsvæðinu er listi yfir þær kannanir sem viðkomandi skóli er skráður í. Smellt er á viðeigandi könnun til að skoða hana (sjá mynd 1).

Á fyrstu síðu könnunar er hægt að velja lista af tölvunni (Excel skjalið) til að senda inn. Einnig er hægt að hlaða niður töflureiknisskjali sem nota má sem sniðmát til innsendingar. (sjá mynd 2).

Þá er listinn forskoðaður með því að smella á hnappinn „Skref 1: Forskoða lista“ og þá sýnir kerfið mögulegar villur og athugasemdir við listann (sjá mynd 3). Ef villur koma upp þarf að leiðrétta þær í listanum og senda hann aftur inn.

Í hvert skipti sem nýr listi er sendur inn þarf að forskoða hann og villuprófa. Þegar engar villur koma upp er listann sendur inn með því að smella á hnappinn „Skref 2: Senda lista“ (sjá mynd 4).

Ef einhverjar spurningar vakna ekki hika við að hringja í síma 583-0700 eða senda tölvupóst á skolapulsinn@skolapulsinn.is.

3. Framkvæmd könnunar

Í byrjun október fær tengiliður Skólapúlsins sendan póst með lista yfir nemendur sem eiga að svara könnuninni. Í úrtakinu eru allir nemendur í 2. til 5. bekk. Í listanum eru upplýsingar um kyn og bekk nemenda og aðgangsorð þeirra ásamt QR kóða fyrir spjaldtölvur. Hægt er að klippa listann í ræmur og afhenda nemendum viðeigandi aðgangsorð og QR kóða. Nemendur fara á yngri.skolapulsinn.is, slá inn aðgangsorðið og svara könnuninni.

Athugið að í könnuninni eru spurningar og svör lesin upp af talgervli. Því er mikilvægt að hver nemandi hafi eigin heyrnatól ef lagt er fyrir fleiri en einn í einu. Nemendur smella á tákn við hvert textabrot til að heyra textann lesinn. Þannig þurfa nemendur ekki að lesa í könnuninnni frekar en þeir vilja.

Eftir að nemandi hefur verið skráður inn í könnunina birtast leiðbeiningar. Passið að hver nemandi lesi og/eða hlusti vel á þær. Lesið þær jafnvel með þeim. Leggið áherslu á að þetta er ekki próf og að það eru engin „rétt“ svör en að hver og einn eigi að svara eins og honum finnst rétt.

Hægt er að svara könnuninni í borðtölvu, spjaldtölvu eða snjallsíma. Flestir nemendur ættu að geta svarað spurningunum á u.þ.b. 10 mínútum. Mælt er með því að fyrirlögnin fari fram um miðbik úrtaksmánaðarins og ljúki a.m.k. fimm dögum fyrir mánaðarmót. Ekki þurfa allir nemendur að svara á sama tíma. Hægt er að sæta lagi þegar færi gefst á skólatíma.

Athugaðu að kerfið birtir engar niðurstöður nema að tilskildu 80% svarhlutfalli úrtaksins hafi verið náð, annað getur gefið skakka mynd af nemendahópnum. Almennt ætti ekki að fjarlægja nemendur úr úrtaki sem tilheyra nemendahópnum nema að þeir skilji ekki spurningarnar vegna mjög alvarlegra þroskafrávika.

4. Ekki henda miðanum strax

Nemendur eiga ekki að henda miðanum fyrr en þeir hafa lokið við að svara könnuninni. Ef sambandið rofnar í miðri svörun er hægt að fara í aðra tölvu skrá sig aftur inn. Könnunin hefst þá á þeirri síðu sem var opin þegar að sambandið rofnaði. Ef að tafir eru á síðunni má svara könnuninni í minni hópum.

5. Næði til að svara í einrúmi

Nemandinn þarf að hafa næði til að svara könnuninni í einrúmi. Skjár tölvunnar sem hann situr við má ekki vera sýnilegur öðrum á meðan hann svarar. Mikilvægt er að nemendur hafi ekki áhrif á svörun þeirra sem sitja næst þeim.

6. Persónuupplýsingar

Vefkerfið hefur verið tilkynnt til Persónuverndar undir númerinu S5590. Engum persónuupplýsingum er safnað í Skólapúlsinum og í þessari könnun eru jafnframt engar persónuupplýsingar unnar. Fullrar nafnleyndar er gætt þegar niðurstöður úr Skólapúlsinum eru birtar einstökum skólastjórnendum. Niðurstöður eru einungis birtar sem meðaltöl stórra hópa og þar sem engum persónuupplýsingum er safnað er ekki unnt að rekja svör einstakra einstaklinga aftur til þeirra.

7. Samband við Skólapúlsinn

Heimasíða Skólapúlsins er www.skolapulsinn.is. Tölvupóstur er sendur á skolapulsinn@skolapulsinn.is. Síminn á skrifstofunni er 583-0700.

*Þegar búið er að svara spurningalista er  þátttökukóða nemandans sjálfkrafa eytt. Þegar könnuninni er lokið er þátttökukóðum þeirra sem ekki hafa svarað einnig eytt.

Heimildir

Mckenna, M. C., & Kear, D. J. (1990). Measuring attitude toward reading – a new tool for teachers. Reading Teacher, 43(9), 626-639. doi:10.1598/Rt.43.8.3

McLellan, R., & Steward, S. (2015). Measuring children and young people’s wellbeing in the school context. Cambridge Journal of Education, 45(3), 307-332. doi:10.1080/0305764x.2014.889659