Aðalsíða » Grunnskólar » Nemendakönnun

Nemendakönnun

Nemendakönnunin fer fram í nokkrum 40 nemenda úrtökum sem dreift er samhverft yfir skólaárið þar sem fjöldi úrtaka fer eftir stærð hvers skóla fyrir sig. Nú er spurningalistinn á sjö tungumálum: íslensku, sænsku, dönsku, pólsku, litháísku, filippeysku og ensku.

Eftirfarandi þættir eru mældir í nemendakönnun Skólapúlsins:

  1. Ánægja af lestri
  2. Áhugi og ánægja af stærðfræði
  3. Áhugi og ánægja af náttúrufræði
  4. Trú á eigin námsgetu
  5. Trú á eigin vinnubrögð í námi
  6. Þrautseigja í námi
  7. Sjálfsálit
  8. Stjórn á eigin lífi
  9. Vellíðan
  10. Tíðni eineltis
  11. Tegund eineltis
  12. Staðir eineltis
  13. Hreyfing
  14. Mataræði
  15. Samsömun við nemendahópinn
  16. Samband nemenda við kennara
  17. Agi í tímum
  18. Virk þátttaka í tímum
  19. Mikilvægi heimavinnu í náminu
  20. Tvær opnar spurningar um skólann

Valið á spurningunum sem í þeim eru byggir að mestu á rannsóknum á íslenskum PISA gögnunum og kvörðum frá Námsmatsstofnun og HBSC (Health Behaviour in School-Aged Children) rannsókninni sem er samstarfsverkefni Háskólans á Akureyri og Lýðheilsustöðvar. Valið er endurskoðað árlega að vori á samráðsfundi með notendum kerfisins.

Með tilkomu nýrra greiningaraðferða var unnt að fjarlægja spurningar úr könnuninni án þess að draga úr réttmæti kvarðanna. Frá og með skólaárinu 2015-16 inniheldur könnunin því 94 spurningar í stað 112 áður en fjöldi matsþátta helst óbreyttur. 18 spurningar voru fjarlægðar úr átta af 18 matsþáttum:

1. Ánægja af lestri (5),
2. Ánægja af náttúrufræði (1),
3. Trú á eigin vinnubrögð í námi (2),
4. Sjálfsálit (3),
5. Stjórn á eigin lífi (1),
6. Vellíðan (4),
7. Samsömun við nemendahópinn (1),
8. Virk þátttaka nemenda í tímum (1)

Stytting könnunarinnar felur í sér að það tekur nemendur styttri tíma að svara henni og er það í samræmi við óskir nemenda og skóla á undanförnum árum.

Framkvæmd könnunar

1. Upplýsingar til foreldra og neitanir

Tengiliður Skólapúlsins tilkynnir foreldrum um þátttöku nemenda í Skólapúlsinum. Fylgt er reglum skólans um þátttöku nemenda í skoðanakönnunum þar sem að engum persónuupplýsingum er safnað. Skólapúlsinn mælir með að í upphafi árs sé sent út bréf í tölvupósti til foreldra/forráðamanna til upplýsingar um að skólinn hyggist leggja fyrir spurningalista með notkun Skólapúlsins. Hægt er að nálgast bréfið og prenta það út hér fyrir neðan. Æskilegt er að foreldrar séu upplýstir um verkefnið áður nemendalistinn er sendur inn. Skólinn sér um að þeir nemendendur sem ekki fá að taka þátt vegna neitunar foreldra séu ekki með í nemendalistanum sem sendur er inn í upphafi skólaársins. Ef foreldrar neita eftir að nemendalistinn hefur verið sendur inn er viðkomandi nemendakóða einfaldlega hent þegar hann berst skólanum.

Foreldrabréf nemendakönnunar (pdf)

Foreldrabréf nemendakönnunar (word)

Foreldrabréf nemendakönnunar (enska pdf)

Foreldrabréf nemendakönnunar (enska word)

Foreldrabréf nemendakönnunar (pólska pdf)

Foreldrabréf nemendakönnunar (pólska word)

2. Upplýsingar sem sendar eru til Skólapúlsins í upphafi árs:*

Nemendalisti skólans í 6.-10. bekk er sendur inn í Skólapúlsinn í einu Excelskjali án auðra raða einu sinni á ári. Í skjalinu skal koma fram:

  1. Fullt nafn (t.d. Jóna Jónsdóttir)
  2. Bekkur (t.d. 6-A, athugið að einhver tölustafanna 6-10 verður að vera fremst í bekkjarheitinu til að unnt sé að greina hvaða árgangi nemandinn tilheyrir)
  3. Kyn (kvk=stelpa, kk=drengur)

Listinn er sendur inn í byrjun skólaársins eftir að foreldrar hafa fengið tækifæri til að neita þátttöku síns barns. Listinn verður notaður til að búa til mánaðarleg úrtök sem verða send til tengiliðs ásamt viðeigandi þátttökukóðum. Þeir skólar sem nota Mentor geta greiðlega náð í þessar upplýsingar þar (sjá mynd 1). Þegar þessu er lokið þarf að vista skrána sem Excel Workbook skrá (með endinguna .xlsx).

Innflutningur á Excel lista

Mynd 1

Upplýsingarnar eru sendar inn sem viðhengi í tölvupósti á listar@skolapulsinn.is. Mikilvægt er að dálkarnir í excel-skjalinu séu í þeirri röð sem sýnd er á mynd 1. Þó dálkarnir í skjalinu verði að vera í ákveðinni röð mega raðirnar vera í hvaða röð sem er.

Ef einhver vandamál koma upp hafðu þá samband í síma 583-0700 eða á skolapulsinn@skolapulsinn.is.

3. Framkvæmd könnunar

Hvern mánuð fær tengiliður Skólapúlsins sendan póst með lista yfir nemendur sem eiga að svara könnuninni. Í úrtakinu eru nemendur í 6. til 10. bekk. Í listanum eru nöfn nemenda og aðgangsorð þeirra. Hægt er að klippa listann í ræmur og afhenda nemendum sitt nafn og aðgangsorð. Þeir fara á www.skolapulsinn.is, slá inn aðgangsorðið og svara könnuninni. Hægt er að svara könnuninni í borðtölvu, spjaldtölvu eða snjallsíma. Flestir nemendur ættu að geta svarað spurningunum á u.þ.b. 15-20 mínútum en gefa ætti allt að 40 mínútur til að svara. Æskilegt er að allur hópurinn svari könnuninni í sömu vikunni ef mögulegt er, helst á sama degi. Mælt er með því að fyrirlögnin fari fram um miðbik úrtaksmánaðarins og ljúki a.m.k. fimm dögum fyrir mánaðarmót. Ekki þurfa allir nemendur að svara á sama tíma. Hægt er að sæta lagi þegar færi gefst á skólatíma.

Athugaðu að kerfið birtir engar niðurstöður nema að tilskildu 80% svarhlutfalli úrtaksins hafi verið náð, annað getur gefið skakka mynd af nemendahópnum. Almennt ætti ekki að fjarlægja nemendur úr úrtaki sem tilheyra nemendahópnum nema að þeir skilji ekki spurningarnar vegna mjög alvarlegra þroskafrávika. Kerfið síar sjálfkrafa frá óáreiðanleg svör þannig að það er allt í lagi að leyfa nemendum að spreyta sig ef þeir eiga einhverja möguleika á að svara.

Þegar nemendur skrá sig inní Skólapúlsinn sjá þeir skilaboðin hér fyrir neðan. Mikilvægt er að tengiliðurinn gangi úr skugga um að nemendur lesi textann og geri sér grein fyrir því sem í honum stendur.

———————————————–

Góðan dag

Velkomin(n) í Skólapúlsinn.
Takk fyrir að taka þátt.

Þessi könnun er lögð fyrir í grunnskólum um allt land.

Hér á eftir finnur þú spurningar um:

  • hvernig þér líður í skólanum
  • hvað þér finnst um skólann
  • hvernig þú lærir

Vinsamlega lestu hverja spurningu vandlega og svaraðu eins vel og þú getur. Þú átt að svara hverri spurningu með því að smella í reit. Síðustu spurningunum átt þú að svara skriflega.

Það eru ekki til nein „rétt“ eða „röng“ svör við spurningunum. Svörin þín eiga að vera þau svör sem eru „rétt“ fyrir þig.

Þú mátt biðja um aðstoð ef þú skilur ekki eitthvað eða ef þú ert ekki viss um hvernig á að svara einhverri spurningu.

Svör þín munu hjálpa skólastjórninni við að bæta skólastarfið. Unnið er úr svörunum þínum með því að telja alla saman sem svara og þannig fundnar út heildartölur og meðaltöl. Það er því ekki hægt að sjá hver svaraði hverju. Nafnið þitt er ekki geymt eftir að þú hefur svarað könnuninni.

Gefðu þér tíma til að hugsa vel um svör þín.

————————————————-

4. Ekki henda miðanum strax

Nemendur eiga ekki að henda miðanum fyrr en þeir hafa lokið við að svara könnuninni. Ef sambandið rofnar í miðri svörun er hægt að fara í aðra tölvu skrá sig aftur inn. Könnunin hefst þá á þeirri síðu sem var opin þegar að sambandið rofnaði. Ef að tafir eru á síðunni má svara könnuninni í minni hópum.

5. Næði til að svara í einrúmi

Nemandinn þarf að hafa næði til að svara könnuninni í einrúmi. Skjár tölvunnar sem hann situr við má ekki vera sýnilegur öðrum á meðan hann svarar. Mikilvægt er að nemendur hafi ekki áhrif á svörun þeirra sem sitja næst þeim.

6. Persónuupplýsingar

Vefkerfið hefur verið tilkynnt til Persónuverndar undir númerinu S5590. Engum persónuupplýsingum er safnað í Skólapúlsinum. Fullrar nafnleyndar er gætt þegar niðurstöður úr Skólapúlsinum eru birtar einstökum skólastjórnendum. Niðurstöður eru einungis birtar sem meðaltöl stórra hópa og þar sem engum persónuupplýsingum er safnað er ekki unnt að rekja svör einstakra einstaklinga aftur til þeirra.

7. Samband við Skólapúlsinn

Heimasíða Skólapúlsins er www.skolapulsinn.is. Tölvupóstur er sendur á skolapulsinn@skolapulsinn.is. Síminn á skrifstofunni er 5830700.

*Upplýsingarnar úr nemendalistanum eru eingöngu notaðar til að búa til líkindaúrtök skólans sem notuð eru í könnuninni. Þegar byrjað er að svara spurningalista er nafni nemandans sjálfkrafa eytt. Þegar búið er að svara spurningalista er  þátttökukóða nemandans einnig sjálfkrafa eytt. Þegar könnuninni er lokið er nöfnum og þátttökukóðum þeirra sem ekki hafa svarað einnig eytt.