Skólapúlsinn hefur um margra ára skeið mælt ánægju af lestri í nemendakönnunum sínum, bæði í 2. – 5. bekk og 6. – 10. bekk. Velflestir grunnskólar landsins, eða yfir 130 talsins, leggja nemendakönnun eldri bekkja fyrir nemendur sína með reglubundnum hætti og hefur könnunin fyrir margt löngu fest sig í sessi sem mikilvæg stoð í innra mati. Í könnuninni er m.a. metin ánægja af lestri og er hún mæld á 9 stiga mælikvarða, þ.e. 0-9 stig.
Nemendakönnun fyrir yngri nemendur var fyrst lögð fyrir árið 2018 og styðst við myndræna framsetningu og talgervla á sjö tungumálum (sjá mynd 1). Sú könnun veitir skólastjórnendum góða tilfinningu fyrir m.a. viðhorfi yngstu nemendanna til lestrar.
Þegar langtímagögn eru rýnd sést að lestraráhugi yngri bekkja hefur ekki dalað að ráði á undanförnum árum (sjá mynd 2). Annað er uppi á teningnum á mið og elsta stigi (sjá mynd 3) en þar mældist meðaltal áhuga á lestri 4,8 stig skólaárið 2017-2018 en 4,3 stig skólaárið 2025-2026. Mest hefur áhugi á lestri dalað á miðstigi þar sem minnkunin er tvöfalt meiri en á elsta stigi grunnskóla (sjá mynd 4).
Mæling ánægju af lestri er sett fram á staðalníukvarða þar sem munur upp á 0,5 stig er lítill munur, munur upp á 1,0 stig er töluverður munur og munur upp á 1,5 stig eða meira er mikill munur.
Háskólanemendur í menntavísindum geta fengið aðgang að heildargögnum úr könnunum Skólapúlsins í tengslum við ritun lokaverkefna eða fræðilegra greina. Dæmi um slíkar rannsóknir má nálgast hér og hér.